Frú Barnaby - Hlaðvarp Lóu og Móu

Frú Barnaby: S5E2 - Marglyttan og ansjósan

Upp komst um hlaðvarpsnjósnir handritshöfunda Midsomer þáttanna þegar tvær miðaldra áhugakonur um galdra og hlaðvarpsþáttagerð skutu upp kollinum í nýjasta þætti Herra Barnaby. Nú við Lóa og Móa látum þetta ekki á okkur fá né hinar ýmsu veirur sem herja á okkur. Hins vegar tökum við á öllum helstu deilumálum samtímans og reynum að gera okkur upp skoðanir á þeim. Veigarnar eru af dýrari kantinum hér í stúdíóinu, verst er þó að sleepy time teið virðist hafa svæft þáttastjórnendur í beinni þannig við getum ekki borið ábyrgð á lokamínútum þáttarins -- bonne nuit 

Frú Barnaby: S5E1 - Urður, verðandi og skuld

Enn og aftur rís frú Barnaby eins og fönix úr ösku og fagnar nú fyrsta þætti fimmtu seríu - hverjum hefði dottið það í hug? Lóa og Móa eru komnar í spádómssokkana og segja okkur hvað næsta ár hefur upp á að bjóða. Þær lesa í Tarot-spilin, ræða pláguna margrómuðu, cocoa-puffs og íslenska sumarbústaðinn í Afríku. Stormurinn blæs fyrir utan stúdíó barnaby og lægðin leggst yfir þær stöllur eins morðóður flóðhestur. 

Frú Barnaby: S4E10 - Hálfmánaverksmiðjan

Nú er sko aldeilis handagangur í öskjunni, en þær Lóa og Móa eru ekki í stúdíó Barnaby í þessum þætti. Því þær stöllur eru búnar að binda á sig svunturnar og hella sér í hálfmánagerð. Í þessum lokaþætti seríunnar ber margt á góma á meðan þær baka vandræðin; Bítlarnir, umhverfisvænar jólagjafir, ímynduð Afríska hálfmánaverksmiðja, ömmur og langömmur. Mitt í öllu jólastressinu, er gott að setjast niður, baka í rólegheitunum og dreypa á öli. 

Frú Barnaby: S4E9 - Með í jól í hjarta

Jólaenglarnir Lóa og Móa eru mættar á jólalínuna og eru með lausnir við öllum ykkar jólavandamálum. Þær veigra sér ekki við að leita til sérfræðinga og fá einn slíkan, heiðursjólasveinninn, Arnar Eggert Thoroddsen sem veitir okkur og hlustendum ráðgjöf hvað varðar afþreyingu yfir jólahátíðarnar. Margt ber á góma hjá þríeykinu; Boney M, Elf, bransinn og majónes. Félagsfræðingurinn sötrar malt og appelsín, setur upp Barnaby gleraugun og greinir jólahefðirnar í öreindir. Um leið uppljóstrar hann ýmsum fyndnum sögum úr heimilislífi hans og ástkonu hans. Jólin nálgast og ekki er laust við eftirvæntingu í stúdíóinu og utan þess. 

Frú Barnaby: S4E8 - Jólastjörnurnar

Í þessum fyrsta aðventuþætti sitja vinkonurnar Lóa og Móa ekki auðum höndum. Þær eru vopnaðar rúmfóbæklingi, vír, skærum og límbyssu því jú það er komið að föndurstund. Þær ræða þess á milli sögulegt jólaföndur og dónalegar piparkökur sem búa í rykugum piparkökuhúsum. Díönuhornið sígilda er á sínum stað en fjölskyldan er auðvitað alltaf við sama heygarðshornið þarna suðurfrá. Síðast en ekki síst opna þær fyrir svokallaða Jóla-línu, þar sem hlustendur geta sent inn jólatengd vandamál sem þær stöllur leysa úr með sinni alkunnu snilli.

Þessi einstaki jólaþáttur er kostaður af Kanínuholunni - fornbókaveröld þar sem jólaandinn á heima.

Frú Barnaby: S4E7 - Hneyksli og hleypidómar

Galvaskar og undirbúnar hlaðvarpsgerðarkonur eru mættar hér í stúdíó Barnaby. Í hlaðvarpinu þar sem allt er hugsað og ekkert er sagt taka orðin þó að streyma stríðum straumum og umfjöllunarefnin eru hneykslanleg: fordómar, framhjáhöld, kvenfyrirlitning og nektarsumarbúðir fyrir fólk sem vill vera í fötum. Nú svo fara heilasellurnar aldeilis á flug þegar þær stöllur sjá fyrir sér að ríkisvæða klámbransann eins og hann leggur sig. Við skulum ekki gleyma að rót alls ills er árans kapítalisminn og þær velja einn kapítalískan púka og hlæja að honum.

Frú Barnaby: S4E6 - Prinsessan og almúgamaðurinn

Þær Lóa og Móa eru glaðar í bragði eftir Lóu-samlokuþátt síðustu viku. Í þessum þætti búa þær meðal annars til ný verðlaun, MLóbelinn, sem þær veita óhikað. Þær vinda sér síðan í mál líðandi stundar, mál sem er á allra vörum þessa dagana: Netflix -jólamyndirnar, Smjattpattarnir, breisku konunar sem við sjáum aldrei í sjónvarpinu. Að lokum taka þær þrefalt Díönuhorn í kók og fara yfir mál Mako fyrrum prinsessu Japana, Kako systur hennar og almúgamannsins Kei Komuro. Skammdegisdrunginn er svo kveðinn burt með kennslustund í hláturjóga. 

Frú Barnaby: S4E5 - Barnatennur úr ókunnugu fólki

Þær Lóa og Móa hella upp á konunglegt te því gest ber að garði, Lóa Hjálmtýsdóttir nokkur, listamaður og rithöfundur. Í þættinum fáiði að vera fluga á vegg í hinu skemmtilegasta teboði þar sem tekið er á stóru málunum og litlu hlutunum. Lóa segir okkur frá söfnunaráráttu, æskuminningum, sjónvarpsþáttum og ótrúlegum tilviljunum lífsins. Móa kemur út úr skápnum sem eltihrellir en Lóa lætur sér hvergi bregða því hún hefur migið í saltan sjó. Tveimur klukkutímum og einum mandarínukassa síðar er enn nóg um að ræða en þá kemur Rupaul og þaggar niður í okkur.

Frú Barnaby: S4E4 - Skinkuhornið

Þjóðháttasafn framtíðarinnar hefur leitað til Frú Barnaby og biður hana um að lýsa fornum heimi, árdaga Skeifunnar, fegurð Grensásvegar og æskustundirnar á Pizzahúsinu. Móa og Lóa fara yfir stóru málin, á að fara í ljós fyrir ballið, er tungumálið þrungið merkingu neindarinnar, nú svo ræða þær kynlíf eldri borgara, senda feðraveldinu fingurinn og finna lykt af fortíðinni. Já það er ofsögum sagt en það vill vera!

Frú Barnaby: S4E3 - Menningarátökin

Lóa og Móa taka við gesti í stúdíóinu og það er engin önnur en menningarmógúllinn og stjórnandinn Auður Jörundsdóttir, boss lady. Hún er okkur í Frú Barnaby vel kunnug sem einn af okkar helstu aðdáendum. Auður leiðir okkur í gegnum líf "menningar-verkamannsins", skoska fortíð og svo koma við sögu ævintýragjarnir kettir á Hólum í Hjaltadal. Ásamt öllu helsta slúðrinu úr myndlistarheiminum. Í Díönuhorninu ræðum við síðan Spencerbrúðkaup og axlarmeiðsl. Et voilà!