Frú Barnaby - Hlaðvarp Lóu og Móu

Frú Barnaby: S4E2 - Vængjasláttur í kálgarðinum

Það er haust, Móa og Lóa eru staddar í matjurtagarði á vegum reykjavíkurborgar - það heyrist þrusk, kjökur og illkvitnislegur hlátur í fjarska. Þetta er einfalt mál að leysa - sökudólgar eru fleiri en einn. Með Barnaby gleraugunum fáið þið innlit í veruleika grænmetisbænda, kvenna í atvinnulífinu, kaupendur lífrænna afurða og ævintýralega exótískt dýralíf á Langanesi. Síðast en ekki síst ræður frúin í drauma í gegnum kosmískan naflastreng til móðurlífsins.

Frú Barnaby: S4E1 - Uppi og niðri

Loksins eru þær Lóa og Móa mættar til leiks fyrir enn eina seríu af Frú Barnaby - vinsælasta hlaðvarp á Íslandi og þó víðar væri leitað. Þær stöllur veigra ekki fyrir sér að hlaupa upp og niður í húsakynnum hinnar virðulegu fjölskyldu Grantham og skoða þar alla króka og kima. Eitthvað ber skuggaleg fortíð Lóu á góma og Móa játar á sig háskalegan fíknisjúkdóm sem tók yfir líf hennar um tíma. Það er aldeilis upp á þeim typpið!

Frú Barnaby: Sumarsmellur

Stjörnurnar röðuðust óvænt upp í fullkomna röð og hið ótrúlega gerðist - Frú Lóa birtist í gættinni; Tene norðursins, illgresi suðursins - vöxtur, rækt og órækt, aldargömul brúðarterta. Vinkonurnar færa ykkur hér á silfurfati sérstakan sumarsmell um leið og þær hita upp fyrir fjórðu þáttaröð. Og nei þær Lóa og Móa hafa sko engu gleymt hvort sem það er í kokteiladrykkju eða slúðri!

Frú Barnaby: S3E15 - La prima vera

Það er komið að endalokum seríu þrjú, þær Lóa og Móa renna hýru auga til sumarsins og velta því upp hvort þessi endalok séu í raun upphaf. Græðlingar, kímblöð, eitruð karlmennska, kynlífsróbót og sjúkdómar í eikartrjám koma við sögu á meðan þær sötra pina colada undir sólhlíf á ímyndaðri strönd. Þær stöllur fara í tímaflakk og skoða sjálfa sig eftir 10 ár í hlaðvarpsbransanum, breiskleiki, Gísli Marteinn og húmorsleysi hefur þá orðið á vegi þeirra og eitthvað orðið þunnt í vináttunni. En engar áhyggjur næsta sería kemur með uppskerunni. 

Frú Barnaby: S3E14 - Grafið í stein

Góðvinur Frú Barnaby er mættur í stúdíóið, það eru íshnettir í glösum og vorsólin skín inn um þakgluggann. Myndlistamaðurinn Matthías Rúnar Sigurðsson heiðrar okkur í þetta skiptið með nærveru sinni og hefur heldur betur náð Coco á sitt band Lóu til mikillrar gleði. Það er farið vítt og breitt um Midsomer og bera Ostamorðin á góma. Við leggjum af stað í ferðalag um hugarheim listamannsins; skordýr, steinar, barnæskan á Bretlandseyjum, amerísk sódóma, heimspeki heimsins og hið eilífa jarðaber eru viðkomustaðir á leiðinni.

Frú Barnaby: S3E13 - Ávaxtakarfan

Móa og Lóa leggjast í rannsóknar, þær þenja út vængi ímyndunaraflsins og verða þær sjálfar fórnarlömb sálgreiningaferlis síns. Veruleikinn tekur á sig aðra mynd, ávextir, nammi, desertar og litir regnbogans fljúga um stúdíó Barnaby. Coco kemur og er gáfulegust að vanda en jafnvel hún verður þreytt á þessum æfingum þeirra sálarsystra og gefst upp á þessu eilífðarmasi. Díönuhornið og sundhornið eru að sjálfsögðu á sínum stað. Ávaxtakveðjur frá Monte og sæsvínunum síkátu! 

Frú Barnaby: S3E12 - Garður dauðans

Þær Lóa og Móa setja ekki upp garðhanskana enda óhræddar við að óhreinka hendar sínar. Henda niður fræum, færa til lauka og eru aldeilis komnar í gúmmístígvélin því sumarið er handan við hornið. Monty don, Barnaby þríhyrningurinn - hættuleg viðreynsla og sofandi hundar koma fyrir í þessum frjósama þætti. Þær komast líka að því að þó garðurinn sé sprúðlandi af lífi getur hann einnig reynst dauðans alvara. 

Móa og Lóa kveðja síðan Hertogann með viðhöfn í lok þáttarins.

Frú Barnaby: S3E11 - Í djúpu lauginni

Frú Barnaby alvarlega lífstílshlaðvarpið fer í saumana á þjóðarsálinni, greinir frá nýjum rannsóknum á tilurð eldgosa. Einnig eru nýjir málshættir kynntir til leiks sem æstir hlustendur þáttarins hafa sent inn. Móa og Lóa "pitcha" nýjan þátt og ræða framtíðaráform frúarinnar - en hún er bara rétt að byrja að dýfa tásum í djúpu laugina.

Frú Barnaby: S3E10 - Hundahvíslarinn

Úr hrjóstrugu nýju hrauni spretta fram handritshæfileikar Lóu og Móu. Þær koma úr biðraðakenndum nútímanum og ferðast til Midsomer í huganum. Nýr Barnaby þáttur er skrifaður "læf" og í honum er allt sem þið gætuð óskað ykkur, hlustendur góðir. Lík í skóginum, hundaáhugamannklúbbur, Díana, Hercúles, Gregory, Patti og að sjálfsögðu ástríðufullur óvæntur endir. Frú Barnaby heldur vígreif á vit páskafrís og býður ykkur að semja nýja málshætti!

Frú Barnaby: S3E9 - Á besta aldri

Eftir langt hlé eru þær stöllur, Lóa og Móa mættar í stúdíó Barnaby í hátíðarskapi. Það er sko skálað í eldgosi fyrir eins árs afmæli Frú Barnaby sem er akkurat á milli afmæla hlaðvarpskvennanna tvenna. Eldgos, grillaðar pulsur, bandarískt slúður og heimsfrægðin sem ber að dyrum. Hér er sko öllu tjaldað til og engu til sparað.